Шеврон спасен од обврската да плати 8,65 милијарди долари отштета

Судот пресудил во корист на компанијата и против американскиот адвокат Стивен Донзигер, кој две децении се бори против Шеврон во овој случај. Со тоа била отфрлена пресудата од еквадорски суд, која, според Шеврон, била издејствувана со подмитување и со измама. Адвокатскиот тим на Донзигер најавил дека ќе ја продолжи борбата, а од Шеврон изјавиле дека со ова се потврдени сите сомнежи дека еквадорската пресуда била неважечка.

Станува збор за светски познат случај за кој е снимен и наградуваниот документарен филм „Круд“. Донзигер ги застапува жителите на регионот Лаго Агрио и бара од компанијата да плати за загадувањето на почвата и на водата што ги извршувала компанијата Тексако од 1964 до 1992 година. Тексако во 2001 година е преземена од Шеврон. Од корпорацијата не негираат дека загадувањето се случило, но велат дека пресудата за отштета од 8,65 милијарди долари била донесена со помош на лажен еколошки извештај и со подмитување на еквадорскиот судија. Оттаму исто така нагласуваат дека државата Еквадор и Тексако уште во 1998 година постигнале договор според кој фирмата се ослободува од одговорност.