Албанската активистка Џентијана Мускај направила изложба од над 40 фотографии од загадувањето на реката Ѓаница.
Целта и била да им ја пренесе на посетителите нејзината загриженост за состојбата со реките. Но освен слики и видео материјали, таа изложила и неколку тегли со вода наполнета од реката.
Ѓаница се смета за најзагадена река во Албанија. Поради индустриското загадување, таа е полна со отпадни масла и со нуспроизводи, а во неа се слеваат и комунални отпадни води. Само неколку минути биле доволни за од теглите да се прошири задушувачки мирис поради отпадните материи во водата.
За Џентијана ниту оваа инсталација не била доволна. Таа донела парчиња облека што се переле со смртоносната вода на Ѓаница. Она што се издвојувало била облеката од новороденче, со што се укажувало дека токму најмладите најмногу страдаат од последиците од загадувањето на реките.
