Зоолошката градина во канадскиот град Калгари соопштила дека седум пингвини биле најдени мртви во својот кафез.
Пингвините биле од видот хамболд, а причините за смртта се уште се нејасни.
- Ова се страшни вести. Почнавме целосна истрага за да утврдиме што точно им се случило на пингвините, и да спречиме такви инциденти да се повторат во иднина - напишал директорот на зоолошката Џејми Дорган, во соопштение до јавноста.
Според првичните информации, пингвините се удавиле. Најмладиот бил стар осум месеци, а највозрасниот седум години. Тие биле пренесени во посебна просторија бидејќи во нивното постојано живеалиште се одвивале градежни работи.
- Разгледуваме различни можности за тоа како дошло до несреќата. Темелно бараме докази. Можно е нешто да ги исплашило птиците, една или две да ги фатила паника. Но засега само шпекулираме - додал Дорган.
Тој истакнал дека целата зоолошка градина тагувала по загубените пингвини, затоа што вработените биле прврзани кон животните.
- Секогаш кога некој чувар ќе дојде наутро и ќе најде вакво нешто, тоа е тежок момент. Многу сме шокирани од тоа што се случи, и голем број луѓе се вознемирени.
Во 2013 година во зоолошката во Калгари умреле поголем број пингвини, меѓу кои и еден хамболд, поради бактериска инфекција.
BLOG COMMENTS POWERED BY DISQUS