mksqen

Бегалските кампови на грчките острови под снег

Бегалските кампови на грчките острови под снег

Типографија

Бегласките кампови на грчките острови се покриени со снег. Бегалците по островите водат битка за опстанок во снегот, во услови на поларни температури, без греење и во мизерни услови на живот.

Во кампот Морија на островот Лезбос снегот ги покрил шаторите на бегалците, а на островите Самос и Хиос десетици бегалци живеат на ладно и без греење.

Невладината организација „Лекари без граници“ и Високиот комесаријат на ОН за бегалци предупредуваат за нехуманите услови во камповите.

На островот Евбеја е прогласена вонредна состојба и таму снежната покривка достигнала два метра. Од саботата многу села на островот се отсечени од светот. Во некои населени места нема струја и вода.

Без струја повремено остануваат и други области во земјата, а сточарите бараат помош за да стигнат до шталите.

Нов студен бран донесе врнежи од снег во многу делови на Грција, додека островите Алонисос и Скопелос останаа без врска со копното затоа што фериботите не пловат.

Во многу делови од Грција училиштата денеска не работат поради обилните снежни врнежи, а метеоролозите предупредуваат дека лошите временски услови ќе продолжат до среда.

Се очекува од вечерва студениот бран да се прошири во североисточна Грција, Тракија, Халкидики, на северните егејски острови и Крит. Се предвидуваат и бури во морето.

Во северозападниот дел на земјата се очекуваат температури и до минус 16 степени Целзиусови, а утрово во оваа област беа измерени минус 13 степени.

Поради студениот бран, патувањето во многу делови од земјата е отежнато и на возачите им се препорачува да не тргнуваат на пат без зимска опрема, особено во северните области на Грција.

BLOG COMMENTS POWERED BY DISQUS
Пријавете се преку нашата бесплатна е-мејл претплата на услуги за да добивате известувања кога ќе има нови информации.

Најпопуларни вести во категорија Балкан